Monday, December 5, 2011

එදා වගෙමයි අදත්

තනිකඩ පැලේ පාලුව දුක ඉතිරෙන්නේ
මගෙ හද එදා මෙන් තවමත් පෑරෙන්නේ
සඳවත මගේ පැල වෙත යලි පායන්නේ
මොන පෝයටද හද සැමදා විමසන්නේ

කුල දෙක නොපෑහුනු කරුමය විඳවනවා
ඔබ මගෙ ලඟින් ඈතට ඇදගෙන යනවා
නිල්වන් කෙස් වැටිය දින දින සුදු වෙනවා
හදවත මගේ දුක ටික ටික වැඩි වෙනවා

ඉර හඳ එදා මෙන් අදටත් පායන්නේ
එනමුදු සියළු දේ නැත එලෙසම වෙන්නේ
බාධක දිරා බිම මත සමතල වෙන්නේ
ඔබෙ හද සොයා මගෙ හදවත දිව එන්නේ

ඔබ මා අතර තිබු බාධක දිය වෙනවා
මගෙ හද මඩල දොරකඩ මා ලතැවෙනවා
සුදු මල් මිටක් ගෙන මා ඔබ වෙත එනවා
සොහොනේ තනිව ඔබ තවමත් ඉවසනවා

Monday, November 21, 2011

කුළුදුල් පෙම සොයා

පාලුව තනිය හදවත රජයන කලක

පිවිතුරු පෙමක සුපැතුම් ඇත හද කොනක

හද කිති කවන සුමිහිරි හැ‍ගුමන් පොදක

පහසින් විකසිතව සැනසෙනු කොයි දිනෙක


දුටුවන් මන බ‍දින රූ සිරි නොමැති ගත

සැගවී තිබෙන හදවත හෙලි කරන වත

සැබැවින් හැදින දිගු කරනා රන් දෑත

රැකගමි දිවිතුරා නොයනෙමි හැර ඈත

Sunday, November 20, 2011

ලස්සනයි ඔබ තාම

මුහුණ සුදු නැතුවාට
කොණ්ඩෙ තඹ නොවුනාට
ඇඳුම් තද නොවුනාට
ලස්සනයි ඔබ තාම

සුන්දරයි පිවිතුරුයි පිපුණු මල් මිට වගේ
මුව වදන් සුමිහිරියි කණට මී පැණි වගේ
මගෙ සිතට පෙම් සිසිල ගෙනෙන කුමරිය මගේ
මුලු හදින් ඔබ මගේ ලඟ ඉන්න පණ වගේ

මුතු සිනා රැඳී මුවේ පෙම් සිනා පිබිදුනේ
හදට හද යා වූනේ පෙම් සිසිල නෑවුනේ
මට මගේ ලෝකයම ඔබම පමණයි ලඳේ
මුලු හදින් මම ඔබේ ලඟ ඉඳිමි පණ වගේ

Sunday, March 27, 2011

නොදරුවා

ඔබ....
කෙතෙක් දෑ උගත්ත ද,
කෙතෙක් දෑ දිනූව ද,
කෙතෙක් උස මහත වූව ද,
එදා ඇකයේ උන්
ඒ නොදරුවාම ය
අදත් ඔබ...
ඔබේ අම්මාට.

Saturday, December 11, 2010

සිතිවිලි සේයා දොරට වැඩුම(Sithiwili seya Book launch)

සිතිවිලි සේයා කාව්‍ය කෘතිය එළි දැක්වීම 2010/11/11 දින ශ්‍රී ජයවර්ධනපුර විශ්වවිද්‍යාලයේ දී උපකුලපති තුමා ඇතුලු ආචාර්ය මහාචාර්යවරුන් හා සිසු සිසුවියන් රැසකගේ සහභාගීත්වයෙන් ඉතා සාර්ථක අන්දමින් පැවැත්විනි.






එහි දී උපකුලපති තුමා දැක්වූ අදහස්(Speech of the vice-chancellor):



පළමු ප්‍රධාන දේශනය (First main lecture) :-
භාශා හා සංස්තෘතික අධ්‍යනාංශයේ අංශ ප්‍රධාන
ආචාර්ය සමන් චන්ද්‍ර රණසිංහ
( Head of the department of languages and cultural studies,
Dr.Saman Chandra Ranasingha)



දෙවන ප්‍රධාන දේශනය (second main lecture) :-
භෞතික විද්‍යා අධ්‍යනාංශයේ
ආචාර්ය මධුරංග ප්‍රනාන්දු
( Dr. Maduranga Fernando,
Depatrment of Physics)



කතුවරයාගේ ස්තූති කතාව(Thanks giving by the Author):

Sunday, November 28, 2010

ගැටළුව

ගැටළු නැති ජීවිතය
ලුණු නොමැති මාළුවකි
දිවග කිසි රසයක් නොදේ
දිවි ගමනෙ අරුතක් නොවේ

ගැටළුවෙන් ගැටළුවට
පිළිවදන් සොයාගෙන
යනෙන මග තුටු මල් පිපේ
දසත සුවඳින් නැහැවෙතේ

අප ව‍ටා ලෝකයම
එකම සරසවි බිමකි
නොදන්නා දෑ බෝ වෙතේ
දැනගන්න බෝ දෑ වෙතේ

Sunday, September 5, 2010

පටලයන්ගෙන් මිදීම

ආදරය නම් පටල බැඳිලා
දුබල විය දෙනෙතම
සුද බැඳුනාක් සේ
නොපෙනී ගියා ලෝකය,
පෙනුනේ ඇස රැඳුනු
පටලයම පමණක්ය

පටලය තුළින් දකින ලෝකය
මනරම්ය,සොඳුරුය.

කාලය නම් වූ වෙදානෝ
විරහ දුක නම් බෙහෙත් පැලයෙන්
කොටා අඹරා ගත්තු යුෂයන්
ජීව ඤාණය නැමැති තෛලෙන්
හොඳින් මුසුකොට කළෙන් වෙදකම්

පසක් විය පුහු බව
පටලයන්ගෙන් මිදීමෙන්